• ఆ తమిళ సినిమా రీమేక్ లో రవితేజ?
    Published Date : 25-Mar-2017 7:36:20 IST

    కాస్త విరామంతో వరసపెట్టి సినిమాలను ఓకే చేస్తున్న హీరో రవితేజ మరో సినిమాకు ఎస్ చెప్పినట్టు సమాచారం. ఈ సారి ఒక తమిళసినిమా రీమేక్ లో నటించబోతున్నాడట ఈ హీరో. తమిళంలో విజయంతం అయిన “భోగన్’’ను రవితేజ రీమేక్ చేయనున్నాడనే మాట వినిపిస్తోంది. తమిళంలో జయం రవి, అరవింద్ స్వామి కాంబోలో వచ్చిన రెండో సినిమా ఇది. తనీ ఒరువన్ స్థాయి హిట్ కాకపోయినా భోగన్ కూడా పర్వాలేదనిపించుకుంది. ఈ నేపథ్యంలో ఆ సినిమా తెలుగు రీమేక్ లో రవితేజ నటించనున్నాడనే టాక్ వస్తోంది.

  • తదుపరి సినిమాపై వెంకీకి నో క్లారిటీ..!
    Published Date : 25-Mar-2017 7:32:03 IST

    తన డెబ్బై ఐదవ సినిమా గురించి ప్రస్తుతానికి ఎలాంటి స్పష్టతా లేనట్టుగా మాట్లాడాడు విక్టరీ వెంకటేష్. ప్రతిష్టాత్మక సినిమా కదా.. అని మీడియా అడుగుతున్నా వెంకీ మాత్రం ప్రస్తుతానికి దానికి గురించి ఆలోచించడం లేదని చెప్పాడు. వెంకీ డెబ్బై ఐదవ సినిమా గురించి పలుప్రతిపాదనలు వచ్చాయి. పూరీ, కిషోర్ తిరుమల, క్రిష్ ల పేర్లు ఆ సినిమా విషయంలో వినిపించాయి. అయితే ఆ మూడుసినిమాలూ ప్రతిపాదనల దగ్గరే ఆగిపోయాయని వెంకీనే చెప్పాడు. ప్రస్తుతానికి ఆ సినిమా గురించి ఆలోచించడంలేదన్నట్టుగా మాట్లాడారు వెంకటేష్.

  • యోగి ఆదిత్యనాథ్ పై విరుచుకుపడ్డాడు..!
    Published Date : 25-Mar-2017 7:27:46 IST

    యూపీ కొత్త ముఖ్యమంత్రి యోగి ఆదిత్యనాథ్ పై విరుచుకుపడ్డాడు ఆ రాష్ట్ర మాజీ ముఖ్యమంత్రి అఖిలేష్ యాదవ్. యోగి ముఖ్యమంత్రి అయ్యాకా.. సీఎం అధికారిక నివాసాన్ని శుద్ది చేయించారన్న వార్తలపై అఖిలేష్ ఘాటు స్పందించాడు. తమకు తిరిగి అధికారం లభిస్తుందని.. అప్పుడు ఫైర్ ఇంజన్లతో గంగా జలాన్ని చల్లిస్తామని అఖిలేష్ అన్నారు. యోగి సీఎం అయ్యాకా రాష్ట్రంలో అల్లర్లు జరుగుతున్నాయని, అయితే మీడియాలో వాటిని చూపడం లేదని, తమ హయాంలో మాత్రం వాటికి విపరీతమైన కవరేజ్ ఇచ్చారని అఖిలేష్ అన్నారు.

  • దీప ఆస్తుల, అప్పుల విలువ ఎంతంటే…
    Published Date : 24-Mar-2017 6:44:59 IST

    ఆర్కే నగర్ నియోజకవర్గ ఉప ఎన్నికల్లో పోటీ చేస్తున్న జయలలిత మేనకోడలు దీపా జయకుమార్ ఆస్తుల విలువ ఆసక్తికరమైన రీతిలో ఉంది. జయతో ఎలాంటి సంబంధం లేకుండా ఇన్నేళ్లూ గడిపేసిన దీప తనకు మూడు కోట్ల రూపాయల స్థిరచరాస్తులున్నట్టుగా అఫిడవిట్ లో పేర్కొనడం విశేషం. గత ఏడాది కాలంలో తనకు ఐదు లక్షల రూపాయల ఆదాయం వచ్చినట్టుగా ఆమె పేర్కొన్నారు. అయితే డెబ్బై లక్షల రూపాయల అప్పులున్నట్టుగా దీప పేర్కొన్నారు. వచ్చే నెల పన్నెండున ఆర్కేనగర్ పోలింగ్ జరగనుంది.

  • బీజేపీ.. ఆ రాష్ట్రంలోనూ పాగా వేస్తుందా?
    Published Date : 24-Mar-2017 6:42:46 IST

    త్రిపుర.. ఈ రాష్ట్రమే భారతీయ జనతా పార్టీ తదుపరి లక్ష్యం అని తెలుస్తోంది. వచ్చే ఏడాది మేఘాలయ, త్రిపురతో పాటు ఈశాన్య రాష్ట్రాలకు ఎన్నికలు జరగనున్నాయి. ఇటీవల మణిపూర్ లో సాధించిన విజయంతో బీజేపీ మరిన్ని ఈశాన్య రాష్ట్రాల మీద కన్నేసింది. మరి అక్కడా పాగా వేస్తుందా అనేది ఆసక్తికరమైన అంశంగా నిలుస్తోందిప్పుడు. ఇప్పటికే త్రిపురలో టీఎంసీ నేతలను భాజపా ఆకర్షిస్తోంది. కానీ అక్కడ ముఖ్యమంత్రి మాణిక్ సర్కార్ కు మంచి పేరుంది. బీజేపీ పప్పులు ఉడుకుతాయో లేదో!

  • ములాయం కోడలు.. యోగితో ఏం మాట్లాడిందంటే..!
    Published Date : 24-Mar-2017 6:38:19 IST

    ములాయం చిన్నకోడలు అపర్ణయాదవ్ యూపీ సీఎం ఆదిత్యనాథ్ తో సమావేశం కావడం అత్యంత ఆసక్తికరంగా మారింది. ఈ సమావేశంలో ములాయం కుటుంబంలో చీలిక తప్పదా అనే ఊహాగానాలూ బయలు దేరాయి. అయితే అలాంటిదేమీ లేదు.. అపర్ణ యాదవ్ కు యోగికి ముందునుంచే సత్సంబంధాలున్నాయనే మాట వినిపిస్తోంది. ఆదిత్యానాత్ గోరక్ పూర్ మఠాధినేతగా ఉన్నప్పటి నుంచినే అపర్ణ ఆయనకు భక్తురాలట. అలాగే గోవుల సంరక్షణకు అపర్ణ యోగితో కలిసి పని చేస్తున్నారట. ఆ పరిచయాలతోనే ఇప్పుడు అపర్ణ యోగిని కలిసి, గో సంరక్షణ గురించి చర్చించారట.

  • సోనియా, రాహుల్ ఒప్పుకోవాలంటున్న విద్యాబాలన్!
    Published Date : 23-Mar-2017 10:38:13 IST

    మహిళా ప్రముఖుల బయోపిక్స్ అనంగానే గుర్తుకొచ్చే పేరు విద్యాబాలన్. డర్టీ పిక్చర్ దగ్గర నుంచి బయోపిక్స్ కు కేరాఫ్ గా మారింది విద్యా, మరి ఇలాంటి సినిమాల్లోనటించడం తనకూ ఇష్టమే అని ఆమె చెబుతోంది. దివంగత ప్రదాని ఇందిర జీవిత కథ ఆధారంగా నటించే సినిమాలో నటించాలని ఉందని విద్య చెప్పింది. ఇందుకు స్క్రిప్ట్ కూడా సిద్ధంగా ఉందని విద్య చెప్పింది. అయితే ఆ సినిమాకు గాంధీ కుటుంబీకులు ఒప్పుకోవాలని ఆమె వ్యాఖ్యానించింది. మరి సోనియా, రాహుల్ లు ఒప్పుకుంటే.. ఇందిర బయోపిక్ వస్తుందేమో చూడాలి!

  • కొహ్లీకి మద్దతుగా నిలిచిన ఆస్ట్రేలియా స్టార్ క్రికెటర్!
    Published Date : 23-Mar-2017 10:37:11 IST

    ఒకవైపు టీమిండియా కెప్టెన్ విరాట్ కొహ్లీపై ఆసీస్ మాజీలు, ఆసీస్ మీడియా విరుచుకుపడుతున్నారు. కొహ్లీ దూకుడుకు తట్టుకోలేని వీళ్లు కొహ్లీపై విమర్శలు చేస్తున్నారు. ఆసీస్ మీడియా అయితే కొహ్లీని అమెరికా అధ్యక్షుడు ట్రంప్ తో పోల్చింది. ఈ నేపథ్యంలో ఒక ఆసీస్ మాజీ మాత్రం కొహ్లీకి మద్దతుగా నిలిచాడు. కొహ్లీ అంటే తనకు ఇష్టం అని స్పష్టం చేసిన ఆ మాజీ క్రికెటరే క్లార్క్. తన దేశం మీడియాను కూడా క్లార్క్ తప్పుపట్టాడు. కొహ్లీ తీరులో తప్పుపట్టాల్సింది ఏమీ లేదని స్పష్టం చేశాడు క్లార్క్.

  • ఆ హాస్య నటుడి సరసన హీరోయిన్ గా నయనతార?
    Published Date : 23-Mar-2017 10:35:14 IST

    హాస్య నటుల సరసన ప్రముఖ హీరోయిన్లు నటించడం ఏమీ కొత్త కాదు. దశాబ్దాలుగా జరుగుతున్నదే. ఈ నేపథ్యంలో ఇప్పుడు మరోసారి అలాంటి కాంబో రిపీట్ కానున్నట్టుగా వార్తలు వస్తున్నాయి. ఆ కాంబోనే.. సూరి, నయనతారలది. వివిధ తమిళ సినిమాల్లో నటనతో కమేడియన్ గా పేరు తెచ్చుకున్నాడు సూరి. విశాల్ సినిమా ‘పూజ’లో కామెడీతో తెలుగునాట గుర్తింపును తెచ్చుకున్నాడితను. ఈ నేపథ్యంలో ఇతడు హీరోగా మారుతున్నట్టు తెలుస్తోంది. ఇతడి సరసన నయన హీరోయిన్ గా నటించనుందని సమాచారం.

  • తెలుగుపై ఏఆర్ రెహమాన్ ఆసక్తికర వ్యాఖ్యలు
    Published Date : 22-Mar-2017 7:42:06 IST

    తమిళంలో తను సంగీతం సమకూర్చిన సినిమాలు తెలుగులోకి అనువాదం అయినప్పుడు.. ఆ సినిమాల్లో పాటలు తమిళంలో కన్నా తనకు తెలుగులోనే బాగా నచ్చుతాయని అన్నాడు ఆస్కార్ అవార్డు గ్రహీత అయిన సంగీత దర్శకుడు ఏఆర్ రెహమాన్. తాజాగా తమిళం నుంచి తెలుగులోకి అనువాదం అయిన ‘చెలియా’ సినిమా ఆడియో విడుదల వేడుకలో రెహమాన్ ఈ వ్యాఖ్యలు చేశారు. మణిరత్నం దర్వకత్వంలో కార్తీ, అదితీరావ్ హైదరీలు హీరోహీరోయిన్లుగా విడుదల అయిన ఈ సినిమా విజయంపై యూనిట్ విశ్వాసం వ్యక్తం చేసింది.

  • ఫలితాలపై జగన్ హ్యాపీ..!
    Published Date : 22-Mar-2017 7:40:12 IST

    ప్రజలు ప్రత్యక్ష పద్ధతిలో ఓటేసిన ఎన్నికల్లో తమ పార్టీ, తాము మద్దతిచ్చిన పార్టీల అభ్యర్థులు విజయం సాధించడం పట్ల ఆనందం వ్యక్తం చేశాడు ఏపీ ప్రతిపక్ష నేత వైఎస్ జగన్ మోహన్ రెడ్డి. ఈ ఫలితాలపై ప్రజాస్వామ్యంపై గౌరవం పెరిగిందని జగన్ అన్నాడు. స్థానిక సంస్థల కోటాలో జరిగిన ఎమ్మెల్సీఎన్నికల్లో తెలుగుదేశం పార్టీ ఎంపీటీసీలను, జడ్పీటీసీలను కొనేసి గెలిచిందని.. అయితే ప్రజలు ఓట్లేసిన ఎన్నికల్లో తెలుగుదేశం పార్టీకి బుద్ధి వచ్చిందని జగన్ అన్నారు. టీచర్స్, గ్రాడ్యుయేట్స్ నియోజకవర్గాల్లో ఎక్కడా తెలుగుదేశం విజయం సాధించలేదు.

  • అప్పుడే… సిద్ధూను రాజీనామా చేయమని కోరనున్నారా?
    Published Date : 22-Mar-2017 7:39:24 IST

    పంజాబ్ లో మంత్రిగా పదవీ బాధ్యతలు తీసుకుని కొన్ని రోజులైనా గడవకముందే సిద్ధూ పదవికి రాజీనామా చేయాల్సిన పరిస్థితి ఏర్పడేలా ఉంది. సిద్దూ రియాలిటీ షోల్లో చేస్తున్నాడని, మంత్రిగా ఉన్న వ్యక్తి అలా చేయడం సబబు కాదన్న ప్రతిపక్షాల విమర్శల నేపథ్యంలో ముఖ్యమంత్రి అమరీందర్ న్యాయ సలహా కోరారు. మంత్రిగా ఉన్న వ్యక్తి టీవీ షోలు చేయొచ్చా? అని అడుగుతున్నారు. మరోవైపు సిద్ధూ మాత్రం తను షోలు వదులుకునే ప్రసక్తే లేదని అంటున్నాడు. తనేం మద్యం, డ్రగ్స్ అమ్మడం లేదు కదా అంటున్నాడు.

  • కొహ్లీపై మరోసారి విషం కక్కిన ఆసీస్ మీడియా!
    Published Date : 21-Mar-2017 6:00:45 IST

    ఆసీస్ మీడియా ఆగడం లేదు.. టీమిండియా కెప్టెన్ విరాట్ కొహ్లీపై విషం కక్కుతూనే ఉంది. ఆసీస్ టీమ్ ను మైదానంలో ఆడేసుకుంటున్న కొహ్లీ అంటే కంగారు మీడియా తెగ కంగారు పడుతోంది. డీఆర్ఎస్ విషయంలో ఆసీస్ కెప్టెన్ స్మిత్ తీరును బయటపెట్టడంతో కొహ్లీ అంటే ఆసీస్ మీడియాకు కసి మరింత ఎక్కువైంది. తాజాగా కొహ్లీని అమెరికా అధ్యక్షుడు ట్రంప్ తో పోల్చింది కొమ్లీ. కొహ్లీ క్రికెట్ లో ట్రంప్ లాంటి వాడని, మీడియాపై విరుచుకుపడుతున్నాడని అంటూ ఆసీస్ మీడియా విషం కక్కింది.

  • ఈవీఎంలతో కాదు, బ్యాలెట్ పేపర్లతో రండి చూసుకుందాం!
    Published Date : 21-Mar-2017 5:54:27 IST

    బీజేపీ నిజంగా దమ్ముంటే, గెలుస్తామన్న నమ్మకముంటే ప్రస్తుతం జరిగిన ఎన్నికలను రద్దు చేసి బ్యాలెట్ పేపర్లతో మరోసారి ఎన్నికలు నిర్వహించాలని రాజ్యసభలో డిమాండ్ చేశారు బీఎస్పీ అధినేత్రి మాయవతి. రాజ్యసభలో ఈ అంశాన్ని లేవనెత్తిన ఆమె యూపీ,ఉత్తరాఖండ్ ఎన్నికల్లో బయటకొచ్చిన తీర్పు ప్రజలు ఇచ్చింది కాదని, ఈవీఎంలు ఇచ్చాయని ఆరోపించారు. ఈ విషయంపై ప్రత్యేక చర్చ జరపాల్సిందేనని తమ పార్టీ సభలో నోటీసులు కూడా ఇచ్చినట్లు చెప్పారు. గతంలో బీజేపీ ఈవీఎంలను వ్యతిరేకించిందని, బ్యాలెట్ పేపర్లతో ఎన్నికలు నిర్వహించాలని డిమాండ్ చేసిందని గుర్తు చేశారు.

  • రజనీకాంత్ పొలిటికల్ ఎంట్రీ.. మళ్లీ హాట్ టాపిక్!
    Published Date : 21-Mar-2017 5:51:25 IST

    తమిళ సూపర్ స్టార్ రజనీకాంత్ రాజకీయల్లోకి వస్తారనే అంశం మరోసారిచర్చలోకి వచ్చింది. తాజాగా భారతీయజనతా పార్టీ నేత గంగైఅమరన్ రజనీతో సమావేశం కావడంతో ఈ అంశం హాట్ టాపిక్ గా మారింది. ఇళయరాజా సోదరుడైన గంగై అమరన్ బీజేపీ తరపున ఆర్కే నగర్ నుంచి పోటీ చేయనున్నాడు. మరి ఈయన రజనీ మద్దతు కోసం కలిసి ఉండవచ్చనే మాట కూడా వినిపిస్తోంది. అదేం కాదు…జయ మరణం నేపథ్యంలో రజనీ రాజకీయాల్లోకి రానున్నాడు, బీజేపీలో చేరడం ఖాయమే అనే మాటా వినిపిస్తోంది. మరి అసలు కథేంటో!